Општина Могила лежи во Пелагониската рамнина, јужно од реката Шемница, помеѓу стариот пат Битола – Прилеп и Река Црна, на просечна надморска височина од 583 метри. Општина Могила е средноголема рурална општина, зафаќа површина од 251,2 км². Има прилично добра географска положба и сообраќајна поврзаност. Низ нејзиниот централен дел минува магистралниот патен правец и железничката пруга Битола – Прилеп. Исто така, од големиот градски центар Битола, централната населба Могила се наоѓа на оддалеченост од само 10 км.

Компаративна предност на општина Могила

Општина Могила е земјоделска општина каде што најмногу се произведуваат житариците и полјоделските култури, но не помалку е застапено и сточарството. Од индустриските објекти позначајна е фабриката за производство на готова животинска храна лоцирана во населбата Радобор. На атарот на Општина Могила стопанисува ЗК Пелагонија и тука се наоѓа најголемата сточарска фарма со околу 800 молзни крави.

Во Могила живее традицијата на печалбарство. Таа е родно место на многу иселеници кои денес живеат во Мелбурн и Сиднеј во Aвстралија, Њу Џерси во САД, Торонто во Канада, Минхен и Франкфурт во Германија, Малме и Гетеборг во Шведска.

Општината се одликува со: квалитетна пространа обработлива површина, реки, шуми, пасишта и незагадена околина кои се ставени во функција на производство на здрава храна.

Општина Могила – Општи податоци

Општина Могила – Сообраќајни врски

Инвестирање во општина Могила

Општина Могила на потенцијалните инвеститори им ја става на располагање Индустриската зона „Петилеп“. Индустриската зона „Петилеп“ се наоѓа 3,5 км северно од село Могила, на регионалниот пат А3. Индустриската зона опфаќа површина од 17,9 хектари. Процентот на изграденост на зоната е 70%. Зоната располага со електрична енергија, водовод, телефонија и патна инфраструктура.

Општина Могила на располагање за потенцијалните инвеститори става и два објекти во нејзина надлежност, лоцирани во населено место Добрушево.